Մարգարյան ծննդատանը կայացավ բուժքույրերի և մանկաբարձուհիների համար նախատեսված վերապատրաստման սեմինարի երրորդ հանդիպումը, որը նվիրված էր բուժառուի, նրա հարազատների և միջին բուժանձնակազմի միջև արդյունավետ փոխհարաբերությունների կառուցման սկզբունքներին։

Զեկույցով հանդես եկավ «Մարգարյան ծննդատուն» ՄՄԱՊԳՀԿ մանկաբարձ-գինեկոլոգ Արմինե Խանամիրյանը։ Նա խոսեց բժշկական էթիկայի սկզբունքների, դրանց կարևորության և դրանց պահպանման անհրաժեշտության մասին՝ շեշտադրելով բուժառուի հետ շփման նրբությունները և բուժառուի հարազատներին վատ լուրի փոխանցման առանձնահատկությունները։

«Ծննդատներում վատ լուրի հաղորդումն ունի իր առանձնահատկությունները, որոնք տարբերվում են սոմատիկ հիվանդություններով հիվանդների հետ շփման ձևերից։ Շատ կարևոր է ճիշտ մոտեցումը՝ նման բարդ իրավիճակներում հարազատների հետ շփվելիս։ Մեր հիմնական նպատակը միշտ պետք է լինի՝ հետևել «Մի՛ վնասիր» սկզբունքին, ինչպես ասում էր Հիպոկրատը։ Բացի այդ՝ պետք է ապահովել բարձր որակով բուժօգնություն, որից հետո բուժառուն տուն վերադառնա գոհ ու շնորհակալ», – նշեց Արմինե Խանամիրյանը։

Սեմինարի ընթացքում քննարկվեցին նաև կոնկրետ օրինակներ՝ վատ լուրի հաղորդման, հաղորդակցման սխալների և դրանց հնարավոր լուծումների վերաբերյալ։ Քննարկման մասնակիցները հնարավորություն ունեցան տեսական գիտելիքներն ամրապնդել նաև գործնականում։

Մասնագետն ընդգծեց, որ բժշկական էթիկայի, ինչպես գրված, այնպես էլ չգրված կանոններն ու նորմերը, պետք է անխտիր պահպանվեն բոլոր բուժաշխատողների կողմից՝ անկախ նրանց փորձից կամ դիրքից, քանի որ դրանք են ապահովում` առավել արդյունավետ կերպով կազմակերպելու բուժառուի բարոյական, սոցիալական և բժշկական աջակցությունը: